筆者:Somethingroyal
寫作日期:7/8/2004
原文位置:賽馬天堂

 

呢隻馬就係 Seattle Dancer 啦.

講起全球最貴周歲馬都有啲野講, 隻馬當年 (1985 年) 喺堅蘭七月拍精選拍賣會賣咗 $13,100,000 一千三百一十萬美金, 折返做港紙, 大約係一億銀到啦, 買一隻周歲馬使成億, 真係瘋狂. 隻馬咁貴都唔係無原因嘅, 阿爸係 Nijinsky 尼真斯基, 阿媽係 My Charmer, 之前生咗 Seattle Slew (美國三冠馬王) 同 Lomond (英國二千堅尼盟主), 所以啲人咪對隻馬仔十分有憧憬囉. 買家係........羅拔桑士打嘅有關財團......

隻馬比人抬到咁貴 (果陣係八十年代) 其實都有原因嘅, 話說由八十年代開始, 阿油王果麥通家族開始喺美國大灑金錢買馬, 咁順理成章堅蘭七月嘅精選拍賣會成為佢地嘅重要入貨基地. 其中一則到現在都係最觸目嘅周歲馬拍賣會新聞應該算係喺 1983 年嘅堅蘭七月嘅精選拍賣會. 當年有隻周歲馬, 老豆係 Northern Dancer, 阿媽係叫 My Bupers, 有乜咁巴閉, 恕小弟真係唔知. 不過當年喺個拍賣會度就十分觸目. 第一口價係 Lukas 承嘅, 一百萬美金, 不過好快就變成阿油王同羅拔桑士打嘅有關財團之爭, 最後油王以 $10,200,000 一千零二百萬美金投得, 破咗當時周歲馬最貴嘅紀錄. 呢隻馬最後叫 Snaafi Dancer 原來係訓練唔到, 所以從未出賽過, 咁諗住比佢打種啦, 不過最後發現隻馬係 infertile 嘅, 配咗一季種, 得四隻馬成孕, 四胎得一匹馬贏到, 咁到最後, 無計, 唯有閹咗佢, 而家呢隻馬好似喺南美比人騎.......一隻曾經係全球最貴嘅周歲馬落得如此田地, 真係可憐

講返隻 Seattle Dancer, 頭先講咗羅拔桑士打喺 1983 年比油王 outbid 咗隻馬, 兩年後, 佢捲土重來, 佢個財團包括 coolmore 嘅 John Magnier, 希臘航運大亨 Stavros Niarchos 即係而家喺法國個 Niarchos 家族, Vincent O'Brien 同 Danny Schwartz, 隻馬係當時喺 BBA (British Bloodstock Agency) 做緊嘅 Joss Collins 推薦, 由佢代表出價. 講開 Joss Collins, 真係難怪羅拔桑士打佢地會咁信任佢, 事關之前經佢引入嘅馬有, Nureyev (羅拔桑士打當年走漏眼, 比 Stavros Niarchos 買咗 )), Caerleon, Woodman, 隻隻都唔係野少.....咁今次羅拔桑士打 outbid 返油王, 隻馬當然係交比 Vincent O'Brien 訓練, 跑咗五場, 贏咗兩場普通嘅 Group 2 賽事, 戰績同身價當然不成正比啦, 配種成就亦唔見十分突出, 之前幾年如果小弟無記錯佢仲係喺日本配種, 再之前又走過去澳洲一段時間, 而呢一兩年好似喺德國配種, 記得幾年前香港隻花旗之寶都係 Seattle Dancer 個仔

其實買馬呢啲野都係十分講運氣, 花咁多錢去買一隻周歲馬風險非常大, 除非你好似油王咁, 根本唔當果啲係錢, 否則呢個唔係你同我可以玩嘅遊戲. 以往經驗已經話比我地聽買馬唔一定要好貴好貴至會買到好馬, 就好似喺香港嘅精選拍賣會咁, 最貴果啲, 由聖德到去年嘅天行者咁, 戰績大家有目共睹. 而就算係羅拔桑士打當年佢名下兩隻葉森打吡冠軍 The Minstrel 同 Golden Fleece 都唔係天文數字, 到買 Fairy Bridge 返黎培育到 Sadler's Wells 一代種馬嘅價錢都係好 modest.

呢一二十年大家喺拍賣會見到嘅會繼續係 Coolmore 同 Godolphin 兩 team 人對壘, 馬價想低都幾難, 大家第時見到 Demi O'Brien 同 John Ferguson 喺拍賣會舉手, 隻馬自己幾有興趣都無謂同佢地玩.......有興趣買馬嘅不如睇吓一啲無乜人吼嘅馬, 話唔定會有好似 Real Quiet, Sunday Silence, Favorite Trick 嘅意外收穫.

 

返回精選文章主頁